Stjórnendahópur Heilbrigðisstofnunar Suðurnesja vann á árinu 2003 að stefnumörkun heilbrigðisstofnunarinnar til ársins 2010. Í þeirri stefnu er gert ráð fyrir að HSS sé fyrsti viðkomustaður Suðurnesjabúa sem leita eftir heilbrigðisþjónustu, bæði heilsugæslu og sjúkrahúsþjónustu, en á svæðinu búa um 17.000 manns. Eins og áður hefur komið fram hafa þegar verið sett markmið um aðgengi og biðtíma skjólstæðinga.
Þjónusta í heimabyggð
Gert er ráð fyrir að auka verulega héraðshlutdeild stofnunarinnar og stefna að því að 80 % af þjónustuþörf á svæðinu sé mætt á HSS. Þetta er nokkuð gróft viðmið þar sem mismunandi markmið þar að lútandi gilda um heilsugæslu annars vegar og sjúkrahúsþjónustu hins vegar. Stefnt er að því að allri heilsugæslu íbúanna sé sinnt á svæðinu og þörf fyrir þjónustu tiltekinna sérgreina sé mætt að að mestu. Önnur sérfræðiþekking verður sótt til LSH. Sérstaklega er hugað að því að draga eins og kostur er úr flutningi sjúklinga til Reykjavíkur með almenn vandamál á sviði lyflækninga. Þá eru fjölmargir Suðurnesjabúar að sækja dag- og göngudeildarþjónustu til Reykjavíkur sem unnt er að sinna á HSS. Ný dagdeild hefur þegar verið opnuð til að mæta þessari þörf.
Heilsugæsla
Heilsugæslan er í brennidepli þannig að uppbygging hennar og frekari þróun er forgangsverkefni ásamt því að koma á traustu samstarfi milli sjúkrahúss og heilsugæslu. Þannig er tryggt að samnýting þekkingar og reynslu starfsfólks komi skjólstæðingum að góðu gagni. Hugtakið heilsugæslusjúkrahús er spennandi kostur í þessu samhengi og nokkuð sem hugað verður að á næstunni. Þar er átt við samtengda heilsugæslu og sjúkrahússtarfsemi þar sem starfsfólk fer á milli sviða allt eftir þörfum skjólstæðinganna hverju sinni og sérþekkingu sem til staðar er hverju sinni.
Sóknarfæri í heilsugæslu
Fjölmörg sóknarfæri eru í heilsugæslu sem lúta að forvörnum og heilsueflingu hjá öllum aldurshópum. Eftir sem áður verður höfuðáherslan á að veita öfluga þjónustu á sviði mæðraverndar, ung- og smábarnaverndar, skólahjúkrunar, heimahjúkrunar og almennrar móttöku. Sérstök unglingamóttaka hefur verið sett á laggirnar til að mæta sérstökum þörfum unglinga á svæðinu. Öflug sykursýkismóttaka heldur utan um sykursjúka með nákvæmu eftirliti og ráðgjöf. Einnig er gert ráð fyrir að sérstök áhersla verði lögð á að sinna einstaklingum og hópum sem þjást af ýmis konar geðsjúkdómum og geðröskunum s.s. átröskunum og vímuefnamisnotkun. Lögð hafa verið drög að sálfélagslegri móttöku geðhjúkrunarfræðings í tengslum við heilsugæsluna og viðræður standa yfir við geðlækna um mögulega aðkomu þeirra að þjónustu við Suðurnesjabúa.
Mikil vinna hefur verið lögð í skipulagningu áfallahjálpar á svæðinu og verður henni haldið áfram en meginmarkmið slíkrar aðstoðar er að fyrirbyggja langvarandi heilsubrest í kjölfar lífsáfalla af ýmsu tagi. Nauðsynlegt er að heilsugæslan hugi að því hvert hennar hlutverk á að vera undir hinum ýmsu kringumstæðum og hvers konar forvarnarstarfi þarf mögulega að hrinda í framkvæmd.
Sjúkrahús
Gert er ráð fyrir að öll D-álman verði komin í notkun fyrir árslok 2005 og að þar verði veitt öflug og góð þjónusta. Nýjar skurðstofur og legurými fyrir skurðsjúklinga er nauðsyn til að sjúkrahúsið geti sinnt hlutverki sínu vel. Núverandi skurðstofuaðstaða er úrelt og svarar á engan hátt kröfum samtímans. Öflug dagdeild í tengslum við skurðstofur gefur möguleika á miklu flæði sjúklinga og hámarksnýtingu skurðstofa. Með slíkri aðstöðu skapast svigrúm til að gera fleiri aðgerðir í heimabyggð og þannig létta á LSH og stefna að því að minnka biðlista. Mikill áhugi er á HSS að koma að því verkefni að minnka biðlista sjúklinga eftir meðferð og aðgerðum á landsvísu. Ef góð aðstaða er fyrir hendi má fullyrða að það sé góður kostur í völdum greinum vegna fjölda sérfræðinga, legurýma og lítillar yfirbyggingar. Forsenda slíkrar starfsemi er öflug vaktþjónusta á viðeigandi sviðum.
Í lyflækningum eru mörg sóknarfæri sem stendur til að nýta. Í fyrsta lagi ber að nefna auknar innlagnir í heimabyggð, þeirra sem ekki þurfa nauðsynlega að leggjast inn á LSH. Í öðru lagi er gert ráð fyrir því að taka fyrr við sjúklingum frá LSH en verið hefur og nýta m.a. hina fullkomnu endurhæfingaaðstöðu til að hjálpa þeim áleiðis á bataveginum. Í þriðja lagi að sinna allri dag- og göngudeildarþjónustu sem ekki þarf nauðsynlega, sérhæfingar vegna, að fara fram í Reykjavík.
Gert er ráð fyrir að góðri aðstöðu verði komið upp fyrir aldraða einstaklinga í hlýlegu umhverfi , þar sem tekið er tillit til þeirra sérstöku þarfa.
Kennslustofnun
Stefnt er að því að halda uppi virkri kennslu og þjálfun fyrir nemendur í heilbrigðisfræðum. Svæðið í heild er kjörið fyrir starfsþjálfun heilbrigðisstétta vegna hinna margvíslegu þjónustuþátta, stærðar upptökusvæðis , nálægðar við höfuðborgarsvæðið og fjölda fagfólks við HSS. Kennsla og starfsþjálfun nemenda er hvatning fyrir fagfólkið til að bæta stöðugt þjónustuna með nýjum og viðurkenndum aðferðum.
Taka þarf tillit til nálægðar HSS við Keflavíkurflugvöll, sem er eini alþjóðlegi flugvöllurinn á landinu, og sérstök þekking í almannavörnum og sóttvörnum verður að vera fyrir hendi. Þá býður herstöðin á Keflavíkurflugvelli upp á víðtæka samstarfsmöguleika bæði hvað varðar þjónustu við heilbrigða og sjúka sem og kennslu og fræðslu.
Að lokum er stefnt að því að HSS verði eftirsóttur vinnustaður fyrir starfsfólk vegna þess að þar verður lögð áhersla á að veita skjólstæðingum úrvalsþjónustu, mikilvægt framlag þeirra verður metið, þar verður lögð áhersla á kennslu og góða starfsaðstöðu og ný þekking verður nýtt við þjónustu og kennslu. Meginmarkmið Heilbrigðisstofnunar Suðurnesja er og á að vera að veita skjólstæðingum hennar góða og skilvirka þjónustu.
